Ngrihet aktakuzë ndaj reperit Fero për dhunë në familje dhe ngacmim seksual

Reperi i njohur nga Gjilani, Feronit Shabani – i njohur në publik me emrin artistik Fero – është zyrtarisht i akuzuar nga Prokuroria Themelore në Gjilan për tri vepra të rënda penale: dhunë në familje, ngacmim seksual dhe kanosje.

Sipas aktakuzës së siguruar nga Paparaci, Fero akuzohet se ka ushtruar dhunë psikologjike dhe sjellje kërcënuese ndaj ish-bashkëshortes së tij, modeles Arbenita Ismajli, në periudhën qershor – tetor 2024.

“Me kon je tu fol… për çka i ke ly buzt?”, citohet të ketë thënë ai në një prej episodeve të përsëritura të ofendimeve.

Në dokumentin zyrtar thuhet se Fero e ka shqetësuar në mënyrë të vazhdueshme Arbenitën përmes telefonatave dhe takimeve në Qendrën për Punë Sociale në Gjilan, duke i shkaktuar “frikë, ankth dhe dhimbje emocionale”.

Përveç dhunës, Fero dyshohet se ka kryer veprën penale të ngacmimit seksual. Në aktakuzë thuhet se ai e ka puthur Arbenitën kundër vullnetit të saj, duke i thënë: “Ti je gruaja jem, unë kam të drejtë me fjet me ty… nuk ki të drejtë me m’thanë jo”.

Këto veprime, sipas Prokurorisë, kanë shkelur rëndë integritetin dhe lirinë personale të të dëmtuarës.

Aktakuza gjithashtu përfshin detaje shqetësuese të kërcënimeve të Feros, përmes mesazheve në WhatsApp, përfshirë fjalët: “Ke me ma ni krismën… të vraj… ta nxjerri shpirtin prej vendit… fëlqitë nga vendi t’i thej…”.

Sipas Prokurorisë, këto ishin përpjekje për të frikësuar dhe kontrolluar emocionalisht Arbenitën, duke përbërë kështu vepër penale të kanosjes serioze.

Fero ishte arrestuar për herë të parë më 11 korrik 2023, për sulm fizik ndaj ish-bashkëshortes. Tashmë, me aktakuzën e ngritur në dhjetor 2024, Prokuroria kërkon dënimin e tij sipas ligjit dhe ka paraqitur provat përkatëse për të mbështetur akuzën.

Avokatja e të akuzuarit, Bedri Shabani, ka konfirmuar për mediat ekzistencën e aktakuzës, por ka refuzuar të komentojë për detaje, duke u thirrur në “natyrën familjare” të rastit.

Ndërkohë, Fero është rikthyer në muzikë pas një pauze dyvjeçare, duke publikuar një projekt të ri pak muaj më parë. Por këto zhvillime ligjore mund të rrezikojnë seriozisht karrierën e tij, ndërkohë që çështja mbetet në duart e drejtësisë.

Reagimi i Feros

Pas publikimit në media të aktakuzës së ngritur ndaj reperit të njohur Feronit Shabani, i njohur si Fero, ka ardhur edhe reagimi i tij i parë zyrtar. Përmes një deklarate të shpërndarë në Instagram, e cila mban emrin e avokates mbrojtëse Bedrie Berisha Rexhepi, reperi ka shprehur shqetësimin e tij për mënyrën si është trajtuar rasti në publik, duke akuzuar mediat për shkelje të ligjit dhe manipulim të opinionit.

“Në lidhje me publikimin e fundit të bërë nga një portal medial më datë 2 korrik 2025, theksojmë me shqetësim se informatat e publikuara përmbajnë elementë të qartë të shkeljes së ligjit dhe të procedurës penale”, thuhet në fillim të reagimit.

Në reagim thuhet se aktakuza ndaj Feros nuk ka marrë ende formë të prerë dhe publikimi i saj është i papranueshëm dhe i motivuar nga interesa që “shkojnë përtej drejtësisë”.

Në këtë deklaratë, Fero bën të ditur se edhe pala tjetër në procesin gjyqësor – pra ish-bashkëshortja e tij, modelja Arbenita Ismajli – është subjekt i ndjekjes penale nga Prokuroria Themelore në Gjilan, duke përmendur aktakuzën dhe aktvendimin për fillimin e hetimeve ndaj saj.

“Këto përpjekje të koordinuara për të diskredituar klientin tim nuk do ta ndalin asnjëherë dëshirën e tij të drejtë për të kërkuar vajzën e tij N.”, thuhet më tej në tekst.

Deklarata përmbyllet me tone emocionale, duke theksuar se Fero nuk do të ndalet në përpjekjet e tij për të rifituar lidhjen me të bijën: “Zëri i tij nuk do të heshtë. Kujtimi i tij nuk do të fshihet. Ai do të vazhdojë të kërkojë të bijën derisa ajo derë të hapet, derisa ai përqafim të ndodhë. Drejtësia ende ka zë dhe zemër në këtë vend.”

revista.one/