Durrës/ Eksploziv bizneseve të Noizyt, Policia: U dëmtua lokali dhe butiku

Një shpërthim me lëndë plasëse ka ndodhur rreth orës 04:24 të mëngjesit të sotëm në godinën 2 katëshe në lagjen 13 në Durrës ku ishin dy bizneset e këngëtarit Noizy.

Policia thotë se shpërthimi ka ndodhur në dyqan e rrobave (butik) ndërsa dëmtime ka pësuar edhe lokali në katin e dytë, ‘Rigels Shisha Lounge’.

Si pasojë e shpërthimit janë thyer xhamat në të dyja katet e ndërtesës.

Deri më tani nuk dihen ende shkaqet e konfliktit dhe as kush janë  autorët që kanë vendosur lëndën plasëse megjithatë dyshohet së është një vazhdim i konfliktit të ndodhur dy ditë më parë ku ai ishte i pranishëm.

Në zonë kanë mbërritur forca të shumta policie të cilat po mbledhin prova materiale.

Njoftimi i policise:  Durrës/Informacion paraprak

Më datë 08.06.2022, rreth orës 04:24, në lagjen Nr.13, në një ambient (butik rrobash) të marrë me qira nga shtetasi B.R., ka shpërthyer një sasi lënde eksplozive.

Si pasojë ka vetëm dëme materiale.

Grupi hetimor nën drejtimin e Prokurorisë vijon hetimet për zbardhjen e ngjarjes, identifikimin e kapjen e autorit/ve.