Pesha e saktë e kokainës që u zbulua në kamion është 324 kg e 400 g

Policia e Durrësit tha sot se në vijim të informacionit të dhënë për sekuestrimin e rreth 300 kg lëndë narkotike në Port, ka dalë me përditësim peshe:

“Pas përfundimit të peshimit të kryer nga grupi hetimor rezultoi që pesha totale është 324 kilogramë e 400 gramë”.

Sakaq, të tjera dyshime janë ngritur në lidhje me sasinë prej 324 kg kokainë që u kap ditën e sotme në portin e Durrësit në një kamion me targa të Maqedonisë së Veriut.

Ajo që mësohet është se kamioni kishte mbërritur në portin e Durrësit mbrëmjen e djeshme, ndërsa gjatë kontrollit me skaner në Qafë-Thanë ka rezultuar i pastër.

Kjo ngre dyshimet se sasia e kokainës është mbushur në Shqipëri. Kamioni kishte për destinacion final Napolin në Itali dhe do të kalonte sërish nga Maqedonia e Veriut.

Kamioni ka qenë i ngarkuar me hekur dhe kokaina ishte e fshehur në trupin e kamionit.

Pas ndalimit të drejtuesit të kamionit, shtetasit maqedonas, Nazif Ajrovksi, në dëshminë e dhënë në polici, është shprehur se nuk ka pasur dijeni nëse në kamion kishte lëndë narkotike.

Ajrovski është shprehur se merret vetëm me transportin e hekurit. Nga ajo që dihet deri më tani është se lënda narkotike ishte vendosur në pjesë të ndryshme të kamionit. Kurse pjesa më e madhe e lëndës narkotike është gjetur ne serbator.

revista.one/