Sapo furnizohet me gaz, makina shpërthen në ecje, plagosen shoferi dhe pasagjeri

Një makinë u përfshi nga flakët sot në mëngjes në aksin Korçë – Pogradec, në afërsi të Maliqit. Nga informacionet paraprake mësohet se dy persona janë plagosur dhe janë dërguar drejt spitalit për mjekim. Drejtuesi dhe pasagjeri kanë marrë djegie në trup, por nuk dihet ende gjendja e tyre shëndetësore.

Një zjarrfikëse e Maliqit shkoi në vendngjarje dhe bëri fikjen flakëve, megjithatë nga makina mbeti vetëm skeleti.

Sipas informacioneve paraprake, mjeti sapo ishte furnizuar me gaz në një nga karburantet e zonës dhe po lëvizte në aksin Korçë-Pogradec, në afërsi të Maliqit, kur janë dëgjuar tre shpërthime të fuqishme dhe mjeti ka marrë flakë.

Drejtuesi ka humbur kontrollin dhe për pasojë makina ka përfunduar në kanal.

Grupi i hetimit ndodhet në vendngjarje për të bërë të mundur zbardhjen e plotë të saj. Burimet kanë bërë me dije se pasagjeri dhe shoferi nuk kanë mundur të dilnin në kohë nga mjeti dhe kanë marrë djegie në trup.

revista.one/