Shitet platforma Tring, blerësi është nga Kosova

Një vit pasi u fol se Tring po bashkohej me DigitAlb, tani është zyrtarizuar se kjo kompani është shitur dhe sërish në lojë është Kosova. Autoriteti i Konkurrencës njoftoi se shoqëria Tring sh.a. është shitur 100 për qind te shoqëria Vertex Holding SHPK. Kjo e fundit është një kompani e hapur në Shqipëri vetëm pak javë më parë.

AK pohon se u njoftua për shitjen më 6 tetor dhe se kontrata është nënshkruar më 2 tetor 2025.

Palët në marrëveshje janë:

Blerësi: Vertex Holding SHPK është shoqëri me përgjegjësi të kufizuar. Ortak i vetëm i shoqërisë blerëse është Valon Shala.

Valon Shala është drejtor i përgjithshëm dhe përfaqësues ligjor i Artmotion, operator i shërbimit të internetit dhe IPTV në Kosovë.

Shitësi: Concord Investmen SHPK, kontrollohet nga ortakët Adrian Dulaku, Artan Dulaku dhe Genci Dulaku.

Shoqëria Target: Tring TV SHA është një shoqëri aksionare që kontrollohet drejtpërdrejt nga shoqëria Concord Investmen SHPK e Dulaksëve. Tring raportoi një xhiro në vlerën e 1.52 miliardë lekëve dhe një fitim neto në vlerën 13.1 milionë lekë.

Tring në shumë vite është renditur e dyta pas DigitAlb në shitje, por vitet e fundit pati rritje pasi mori thuajse të gjitha eventet kryesore të futbollit që më parë ishin në Supersport, pjesë e DigitAlb.

revista.one/