U shua në moshën 91-vjeçare! Margarita Xhepa, ikona e Teatrit dhe Kinematografisë Shqiptare

Margarita Xhepa, një nga emrat më të shquar të artit skenik dhe kinematografisë shqiptare, u nda nga jeta duke lënë pas një trashëgimi të pasur artistike. Me një karrierë që shtrihet në më shumë se gjashtë dekada, ajo ka skalitur memorien e publikut shqiptar me interpretimet e saj të fuqishme dhe të paharrueshme.

E lindur me një pasion të madh për artin, Margarita Xhepa nisi rrugëtimin e saj në skenë në vitin 1950, kur u aktivizua si artiste provë në Teatrin Popullor (sot Teatri Kombëtar). Paralelisht, ajo ndoqi studimet në Liceun Artistik, dega e Dramës, duke ndërtuar bazat e një karriere të shkëlqyer.

Gjatë karrierës së saj, Margarita Xhepa krijoi mbi 150 role në teatër, duke u bërë një nga figurat më të spikatura të skenës shqiptare. Ndër rolet më të njohura në dramaturgjinë kombëtare përmenden Majlinda tek “Majlinda”, Dafina tek “Lumi i vdekur”, Filja tek “Cuca e maleve”, Zonja Mëmë tek “Kush e solli Doruntinën”, Nëna tek “Përballë vetes”.

Në dramaturgjinë botërore, interpretimet e saj spikatën në role ikonike si Ofelia tek “Hamleti”, vajza e dytë tek “Mbreti Lir”, dado tek “Romeo e Xhulieta”, Mbretëresha Margaret tek “Rikardi III”. Po ashtu, Margarita Xhepa shkëlqeu në vepra të tjera të autorëve të mëdhenj botërorë, duke sjellë në skenë personazhe si Klea tek “Dhelpra dhe rrushtë”, Lena tek “Xhaxha Vanja”, Ledi Milford tek “Luiza Miler”, Zonja Berling tek “Vizita e inspektorit”, Zonja Lomen tek “Vdekja e një komisioneri”, Ana Andrejevna tek “Revizori”, Marsela tek “Qeni i kopshtarit”, Mashenka tek “Mashenka”, Shejla tek “Morali i zonjës Dulska” dhe dado tek “Elektra” e Sofokliut, nën drejtimin e regjisorit grek Dhimitri Mavriqis në Teatrin Kombëtar të Greqisë në Athinë.

Veç suksesit në teatër, Margarita Xhepa la gjurmë të thella edhe në kinematografi. Ajo realizoi 32 role në filma artistikë, duke bashkëpunuar me regjisorët më të njohur shqiptarë. Disa nga filmat ku ajo interpretoi janë “Vitet e para”, “Gjurmët”, “Dimri i fundit”, “Tokë e përgjakur”, “Një djalë edhe një vajzë”, “Apasionata”, “Gjeneral gramafoni”, “Rrethi i kujtesës”, “Vitet e pritjes”, “Dora e ngrohtë”, “Gurët e shtëpisë sime”, “Pranvera s’erdhi vetëm”, “Koncert në vitin 1936”, “E diela e fundit” dhe “I dashur armik”.

Në vitin 1997, Margarita Xhepa interpretoi në filmin grek “Mirupafshim”, një vepër që u vlerësua me Çmimin e Madh në Festivalin Ndërkombëtar të Filmit Mesdhetar në Selanik. Për interpretimin e saj, ajo u nderua me Çmimin e Nderit, duke dëshmuar edhe një herë talentin dhe vlerën e saj në skenën ndërkombëtare.

Margarita Xhepa mbetet një nga figurat më të ndritura të artit shqiptar. Me talentin, përkushtimin dhe pasionin e saj, ajo u kthye në një ikonë të teatrit dhe kinematografisë, duke lënë një trashëgimi të pasur që do të frymëzojë brez pas brezi.

Puna dhe arti i saj nuk do të harrohen kurrë, por do të jetojnë në kujtesën e çdo shqiptari që e ka ndjekur dhe e ka admiruar. Lamtumirë, Zonjë e Madhe e skenës shqiptare.

revista.one/