Kërkohen 30 vite burg/ Mikel Alia nxori në pritë Eri Zefin, shokun e fëmijërisë për ta ekzekutuar

Prokuroria e Lezhës ka kërkuar dënimin me 30 vite burg të 42-vjeçarit Mikel (Gjovalin) Alia, ndaj të cilit u ngrit akuza e vrasjes në bashkëpunim, pasi me 2 tetor të vitit 2019-të nxori në pritë shokun e tij të fëmijërisë Eri Zefi për ta ekzekutuar.

Konkluzionet janë dhënë nga Prokurori Erjon Shehaj, i cili ka hetuar çështjen dhe tashmë do të jetë gjykata që do të vendosë për fatin e 42-vjeçarit.

Mikel (Gjovalin) Alia është personi i vetëm i marrë i pandehur për vrasjen e Eri Zefit, në Zall Xhuxhë të Mirditës dhe ai u zbulua përmes mesazheve, tabulateve telefonike e pamjeve filmike.

34-vjeçari Eri Zefi u gjet i pajetë pak metra larg Rrugës së Kombit nga banorët e zonës tetorin e vitit 2019. Alia u arrestua disa javë më vonë, ndërsa tani Gjykata “është bindur” se ai është autori i krimit.

Ngjarja

Policia e Mirditës në bashkëpunim me prokurorinë e këtij rrethi ka zbardhur ngjarjen ku mbeti i vrarë Eri Zefi, krimi i ndodhur më 2 tetor pranë Rrugës së Kombit. Policia ka shpallur në kërkim Mikel Alian, i cili ishte shok fëmijërie me viktimën. Ai mendohet se ka nxjerrë në pritë Zefin. 34-vjeçari prej muajsh ruhej nga frika e gjakmarrjes. Kjo pasi, vëllai i tij, Ndue Zefi vrau në muajin shkurt 2019 në Durrës fqinjin e tij, 45-vjeçarin Martin Ndreca, pas një sherri banal. Eri Zefi, 34-vjeçari i vrarë me gjashtë plumba dhe i hedhur në një kanal në fshatin Zallë Xhuxhë të Mirditës, është nxjerrë në pritë nga vetë shoku i tij i fëmijërisë. Hetimet e zhvilluar nga Prokuroria e Lezhës, kanë nxjerrë në dritë se për vrasjen e Zefit, një rol mjaft të rëndësishëm ka kryer shoku i tij i ngushtë Mikel allias Gjovalin Alia. Nga analizimi i shumë të dhënave të mbledhura përgjatë një muaji, është arritur në konkluzionin se Mikel Alia, ka nxjerrë në pritë 34-vjeçarin Eri Zefi. Ky i fundit prej muajit shkurt 2019 kishte reduktuar lëvizjet e tij dhe frekuentimin e personave të ndryshëm, pasi i ruhej një gjakmarrje të mundshme. Kjo pasi, Eri Zefi është vëllai i Ndue Zefit, ky i fundit në shkurt të këtij viti ka vrarë fqinjin e tij, 45-vjeçarin Martin Ndreca. Si pasojë e kësaj vrasje, Eri Zefi, i ndruhej një hakmarrje të mundshme dhe për këtë ai kishte marrë kërcënime të njëpasnjëshme. Por gjakësit e tij, nuk mund t’i afroheshin shumë pranë banesës me qëllim ekzekutimin e Zefit, pasi shumë shpejt do të binin në sy dhe do vinin veten e tyre në rrezik. Atëherë ata kanë filluar të vënë në jetë një plan të sofistikuar duke përpunuar dhe paguar shokun e ngushtë të Eri Zefit, Mikel Alia, me qëllim që ky i fundit ta nxirrte nga shtëpia Zefin dhe t’ia çonte në pritë dy qitësve, që ishin caktuar për të bërë vrasjen. Mendohet se për një shumë parash ende të papërcaktuar, Alia ka pranuar të shesë shokun e tij të ngushtë, duke e nxjerrë nga shtëpia, falë direktivave dhe skenarit që kishin bërë gjakësit.

Zbulimi

Gjatë hetimit është provuar se Alia ka komunikuar në telefon, por edhe në mënyrë verbale me Eri Zefin, duke i kërkuar të bashkëpunojnë sëbashku për të vjedhur në mesnatë një sasi të konsiderueshme hashashi në një territor malor, që ndodhet në fshatin Zallë Xhuxhë të Mirditës. Eri Zefi, ka pranuar ofertën e mikut të tij të fëmijërisë, të cilit i besonte në mënyrë të verbër, dhe janë nisur së bashku të dy me makinë në vendin ku ishte caktuar për t’u bërë vrasja. Ata kanë udhëtuar në mesnatë në autostradën Durrës-Kukës, dhe sapo kanë mbërritur në fshatin Zalë Xhuxhë, kanë dalë nga rruga duke hyrë rreth 50 metra në një teren malor, ku Mikel Alia, pretendon se aty do vidhnin drogën. Por në fakt ai teren ishte caktuar nga hasmit, për të ekzekutuar njëherë e mirë Eri Zefin, vëllanë e Ndue Zefit. Sapo Alia dhe Zefi kanë dalë nga makina dhe ndodheshin mes errësirës, mes disa shkurreve janë shfaqur dy persona ende të paidentifikuar duke ushtruar dhunë barbare ndaj Zefit. Më pas ata e kanë qëlluar me plot 6 plumba, katër në kokë dhe dy në gjoks duke e lënë të vdekur në vend. Dy autorët së bashku me bashkëpunëtorin e tyre, mikun e Zefit janë larguar mes errësirës së dendur. Trupi i pajetë është gjendur nga fshatarët e zonës i mbuluar në gjak, të cilët kanë njoftuar policinë. 

revista.one/