Bebe Rexha: Si dështova t’i bëj bashkë Rita Orën dhe Dua Lipën

Këngëtarja shqiptaro-amerikane Bebe Rexha publikoi së fundmi albumin e saj më të ri, “Better Mistakes”. Por asaj mungonte një këngë – bashkëpunim midis saj, Ritës, Duas dhe Ava Max Që të gjitha kanë prejardhje shqiptare.

Në një intervistë të fundit për “The Sun”, ajo tha se bashkëpunimi i famshëm tani beson se nuk do të ndodhë kurrë për shkak të grindjes midis yjeve.

Në një përgjigje të formuluar me kujdes kur u pyet për marrëdhëniet mes vajzave shqiptare, Bebe Rexha tha: “Unë kam provuar vërtet. Nuk e di se çfarë po ndodh realisht atje ose cila është drama. Jam përpjekur të jem gjithnjë paqeruajtëse dhe t’i sjell vajzat së bashku”.

“Për mua, me të vërtetë do të doja të bëja diçka së bashku. Por nuk jam e sigurt që do të ndodhë ndonjëherë. Dhe nuk do të them më shumë për këtë”, tha ajo.

Dua dhe Rita, prindërit e të cilave janë të gjithë nga Kosova, nuk e kanë diskutuar kurrë rivalitetin e tyre. Megjithatë, besohet se ka marrëdhënie të ftohura mes tyre.

Bebe Rexha llogarit se ato janë bërë “konkurruese” me njëra-tjetrën për shkak të presioneve për të qenë në industrinë e muzikës.

Ajo tha: “Është e çuditshme sepse unë e di se si është të jesh vajzë dhe ndonjëherë mund të bëhemi vërtet konkurruese. Unë nuk jam duke folur për veten, Duan, Ritën dhe Avan. Unë jam duke folur për femrat në përgjithësi. Çfarë ndodh është se nuk ka mjaft femra në tryezë”.

Bebe Rexha ka kompozuar për disa nga artistët më të mëdhenj në botë, është nominuar për çmimet ‘Grammy’ dhe shiti më shumë se 10 milionë kopje të këngës së saj hit “Meant To Be”.