Dhunoi dhe kërcënoi të shoqen me pistoletë, arrestohet në Palasë ‘Visi i Garave’

Këtë të diel në një resort turistik luksoz në jug të vendit është dashur ndërhyrja e forcave të policisë për të arrestuar Elvis Kosovën, personazh i njohur si “Visi i Garave” për shkak të të shkuarës së tij.

Por nuk ka qenë e shkuara që e ka prangosur Kosovën. Në Palasë teksa qëndronte për pushime ai dyshohet se ka dhunuar dhe ka kanosur me armë bashkëshorten e tij. Policia njofton se ka marrë njoftimin rreth orës 13:40 për një konflikt familjar, i cili kishte përshkallëzuar dhe për këtë u kërkuan forca shtesë policie, si Forca Kombëtare e Sigurisë, Njësia e Fierit.

Policia thotë se në vilën e kompleksit në zonën e Palasës gjeti një pistoletë të fshehur te tubat e ujit, ndërsa gjatë kontrollit që u bë në banesën e Elvis Kosovës në Tiranë u gjetën edhe dy pako me municion luftarak dhe dy krehra me fishekë.

Elvis Kosova, 40-vjeçar, njihet si biznesmen në fushën e shitblerjes së automjeteve dhe zotëron edhe një biznes për makina me qira.

Verën e vitit të shkuar, atij iu vendos një sasi lënde plasëse në portën hyrëse të garazhit të tij në zonën e “Liqenit të Thatë” në Tiranë. Në gusht të vitit 2024 ai u ndalua për vjedhjen e një makine luksoze “Audi R8”, me vlerë rreth 200 mijë euro, që ishte sjellë fillimisht nga Gjermania nga një turk, dhe më pas ishte përvetësuar nga Elvis Kosova përmes mashtrimit.

Pasioni i tij janë garat e shpejtësisë dhe shpesh ka marrë pjesë në kompeticone të ndryshme, ku e njohin si “Visi i garave”.

Gjatë vitit 2022 biznesmeni është hetuar për organizimin e një gare të paligjshme me makina tek mbikalimi i Patokut. Uniformat blu iu vunë në ndjekje pasi e zbuluan nga videot e hedhura në rrjetet sociale, dhe më tej nga hetimet, rezultoi se Elvis Kosova po e çmontonte në një servis makinën e garës, ndërsa u gjobit nga policia rrugore me 120 mijë lekë të reja. Në këtë sfidë, Elvis Kosova, vinte me fitoren e garës Drag Race, zhvilluar në Kosovë gjatë pandemisë Covid-19.

revista.one/