Kastro Zizo nderohet me çmim nga Kryetari i Bashkisë në New York

Këngëtari dhe kantautori i njohur Klevis Bega ose ndryshe i njohur me emrin e artit Kastro Zizo, është nderuar së fundmi me “Cerfitikatën e Mirënjohjes” nga Kryetari i Bashkisë në New York, Eric Adams.

Ky çmim inkurajon krijimet artistike, nxit shërbimin ndaj komunitetit dhe vlerëson artistët e shquar  apo dhe lider të cilët kanë dhënë kontribute të rëndësishme në jetë për zhvillimin e komunitetit dhe shoqërisë.

Katstro është vlerësuar për arritjet e tij të jashtëzakonshme në art dhe karrierën e tij profesionale në muzikë dhe TV për më shumë se 25 vite.

Në certifikatën e vlerësimit shkruhej:

“Çertifikata e Njohjes së Qytetit të Nju Jorkut iu dorëzua Klevis Begës për arritjet tuaja si këngëtar, kantautor dhe aktor i njohur profesionalisht si Kastro Zizo. Ju keni angazhuar dhe frymëzuar njerëz në Shqipëri, vendin tuaj të lindjes, diasporën e saj dhe më gjerë. Me shumë kënaqësi i bashkohem Klubit Rrënjët Shqiptare të Kolegjit St. Francis në Bruklin për të duartrokitur punën tuaj si një artist i talentuar dhe kontributet tuaja për komunitetin vibrant shqiptaro-amerikan të qytetit të Nju Jorkut. Së bashku ju dëshirojmë suksese të vazhdueshme ndërsa bashkohemi me #GETSTUFDONE dhe krijojmë një të ardhme më të ndritshme, më harmonike dhe më të begatë për të gjithë. – Eric Adams, kryetar bashkie, 26 janar 2023, Nju Jork”.

Çmimi iu prezantua artistit Klevis Bega (Kastro Zizo) nga z. Maliek Sterrett, Drejtor i Çështjeve Multikulturore gjatë serisë së leksioneve “Edicioni Unlimited” mbajtur në Kolegjin St. Francis më 26 janar 2023:

“Në emër të Zyrës së Çështjeve Multikulturore dhe Kolegjit St. Francis, është nder dhe privilegj t’ia dorëzoj këtë çmim të kryebashkiakut artistit Kastro Zizo. Faleminderit që gjetët këtë kohë për të ndarë përvojat tuaja me studentët, stafin dhe të ftuarit tanë, për t’u dhënë atyre frymëzim që të ndjekin gjithçka që zemra e tyre dëshiron. Ju përgëzoj që vazhdoni të jeni ndryshimi i nevojshëm për të patur me të vërtetë një ndikim në botë.”- u shpreh Maliek Sterrett.

Me anë të një postimi në rrjetet sociale Kastro u shpreh se ndihej i nderuar që mori një çmim kaq të rëndësishëm, ku ndër të tjera shprehu dhe falënderimet e tij:

“Ndjehem tepër i nderuar që kam marrë një çmim kaq të rëndësishëm nga Kryetari i Bashkisë së Nju Jorkut, z. Eric Adams, Certifikata e Njohjes nga Kryetari i Bashkisë. Unë jam sinqerisht mirënjohës për vlerësimin që kam marrë për punën time dhe do vazhdoj te jem i përkushtuar të sjell ndryshime pozitive përmes artit, “artivizmit” dhe diplomacisë kulturore për të lidhur Shqipërinë dhe Shtetet e Bashkuara të Amerikës.

Ky çmim është shumë domethënës për mua pasi shënon mbi 25 vjet karrierën time profesionale në art dhe TV, dhe përkujton punën time jofitimprurëse në mbrojtjen e të rinjve përmes organizatës “E ardhmja ime, e tashmja ime!”. Dëshiroj të falënderoj të nderuarin Kryetarin e Bashkisë z. Adams për mirënjohjen. Është një nder i madh për mua të marr këtë çmim special. Dëshiroj të shpreh falënderimet e përzemërta për NY St. Francis College (SFC), z. Maliek Sterrett dhe Albanian Roots Club të SFC për mbështetjen,”- shkroi këngëtari.