Marco Mengoni mbretëron në Sanremo 2023, Ana Oxa dhe Iljard Shaba na bënë krenar!

Sanremo 2023 u mbyll dhe fituesi i edicionit të 73-të të festivalit të rëndësishëm të muzikës italiane është Marco Mengoni me këngën “Due Vite” (Dy jetë).

Ky ishte dekretimi i fitores pasi 34-vjeçari dukej që në fillim i favorizuar e kryesoi renditjen e përgjithshme që prej fillimit. Pesëshen e më të mirëve e plotësuan Lazza, Mr.Rain, Ultimo e Tananai, me numrin më të lartë të votave. Dukshëm i emocionuar dhe i përlotur, Mengoni tha se fitoren ia kushton të gjitha artisteve që morën pjesë në festival.

“Jemi pesë djem që arritëm finalen ndaj mendoj se është e drejtë t’ia kushtoj artisteve që sollën krijime të mrekullueshme në këtë skenë”, tha fituesi.

Emocione e duatrokitje të gjata në sallë për performancat e legjendave të këngës italiane Gino Paoli e Ornella Vanoni, si edhe për Depeche Mode.

Me Çmimin e Kritikës “Mia Martini” u vlerësua Colapesce Dimartino për “Splash”. Çmimi “Sergio Bardotti” për tekstin më të mirë shkoi për Coma_Cose dhe  “L’addio”.

Një mendim edhe për Ukrainën, prej rreth një viti nën pushtimin rus, agresion që ka shkaktuar mijëra viktima e miliona të zhvendosur, krahas shkatërrimeve të mëdha në infrastrukturë. Prezantuesi Amadeus lexoi letrën që presidenti ukrainas Volodymyr Zelensky i dërgoi pjesëmarrësve.

“Me siguri që Ukraina do ta fitojë këtë luftë. Do ta fitojë bashkë me botën e lirë. Do të fitojë falë zërit të lirisë, të demokracisë e sigurisht, të kulturës. Jam i bindur se një ditë, të gjithë bashkë do të dëgjojmë këngën tonë të fitores”.

Ndërkohë, nuk mund të kalonte pa provokime mbrëmja finale e Festivalit të Sanremos 2023 në Italinë fqinje dhe për këtë mendoi Rosa Chemical. Nga skena iu drejtua radhës së parë ku mori Fedezin, dukshëm i sikletosur dhe me të u rikthye në skenë. E përqafoi e më pas i dha një puthje pasionante në buzë.

Ndërkohë, Këngëtarja shqiptare me famë në Itali, Anna Oxa, i është rikthyer konkurrimit në festivalin e ‘Sanremos’ pas 12 viteve.

Ajo performoi në natën e parë këngën e saj konkurruese me titull “Sali”, e cila është pritur jashtëzakonisht mirë nga publiku italian.

Në natën e tretë të festivalit, e cila njihet si nata e rikthimit të këngëve tradicionale, Anna Oca nuk mbeti e vetmja shqiptare në skenën e madhe të ‘Sanremos’.

Kjo pasi ajo kishte ftuar për ta shoqëruar në këngë violonçelistin e njohur shqiptar, Iljard Shaba.

Dyshja kanë interpretuar së bashku këngën e famshme të Anna Oxës, “Un’emozione da poco”, me të cilin dikur këngëtarja me origjinë nga Kruja ishte prezantuar në festivalin e famshëm italian, në vitin 1978.

Performanca e dy artistëve shqiptarë është pritur jashtëzakonisht mirë dhe me duartrokitje të ngrohta nga publiku italian.

Iljard Shaba është një artist i cili krenohet me një karrierë dhjetëvjeçare si DJ dhe në moshën 16-vjeçare filloi të luante violonçel. Një muzikant i zhanrit ‘eletronic’ që kalon nga muzika klasike në xhaz, në muzikë latine, e deri në këngë popullore.

Anna Oxa performoji edhe mbrëmë në natën finale të ‘Sanremo 2023’, ku nuk arriti të jetë e përzgjedhur nga publiku dhe juria, në pesëshen e më të mirëve.

revista.one/