Olen Cesari kthehet në Liceun Artistik, violinisti tregon klasin me muzikë filmash

Liceu Artistik “Jordan Misja” rinis programin Alumni për vitin 2022 me
Masterclass nga Olen Cesari. Violinisti me famë botërore ka ardhur nga Italia dhe po u tregon nxënësve mjeshtrinë e tij. Masterclass po zhvillohet në 27-28 Janar ora 13:30
Salla ” Tonin Harapi” Liceu Artistik i Tiranës. Programi ka në qendër muzikë të kolonave zanore të filmave klasikë.

Kush është Olen Cesari

Olen Cesari ka lindur në Durrës. U ngjit në skenë në moshën 5-vjeçare si një virtuoz i lindur dhe në moshën 7-vjeçare dha koncertin e tij të parë recital në teatrin “Aleksandër Moisiu” të Durrësit. Në moshën 10-vjeçare e mbaroi gjithë programin e Liceut Artistik dhe si mbaroi këtë ai ishte i vetmi fëmijë mes studentëve 24-vjeçarë që korrte sfidat në Institutin e Lartë të Arteve. Shteti e dërgoi në Romë të vazhdonte studimet për violinën. Në moshën 18- vjeçare kishte mbaruar 3 konservatore: një në Shqipëri, një në Itali, dhe një në Austri.

Në tetor 2021, Olen Cesari dekorohet nga presidenti i Italisë Sergio Mattarella me titullin “Komendator i Urdhrit të Yllit të Italisë”. 

Dekorata iu dorëzua artistit shqiptar nga ambasadori i Italisë në Tiranë Fabricio Bucci në një ceremoni ku ishin të pranishëm personalitete të vendit, artistë të shquar dhe diplomate.

revista.one/